قصيدة للشاعر / غالب أبو كتيفة العصيمي

وطنا يا وطنا كلنا دونك حجا ودروع= نقف دونك ومن دونك يدين الغدر نقطعها

نقف دونك جموع وبالرصاص نصدّ عنك جموع= ليا قضّت جدايلها الهنوف وبان مفرعها

تحت توجيه ابو متعب نصوع القوم دونك صوع= على حدّك تجوز اهل المطامع من مطامعها

وطنا وانت ابونا اللي على هاماتنا مرفوع= وطنّا وانت الامّ اللي نبرّ ابها وننفعها

الا يا حرفي المقري والا يا صوتي المسموع= ابكحل بك عيون الناس واملا بك مسامعها

الي عامين وافكاري مقيّدها الظما والجوع= ولا ادري كيف ابرويها ولا ادري كيف ابشبعها

لكن الليله الليله تحطّم حاجز الممنوع= وابرقا بالقصيده لين ترضي ذوق سامعها

نقيت من الشرايد ما يليق بمستوى الموضوع= انا ماني مضرّيها على تدريج ضلّعها

سلامة سيدي مشروع مابعده ولا مشروع= مناسبة ٍ يزين ابها القصيد وينسجم معها

بعد صار الشهر كنّه سنه واليوم صار اسبوع= عسى عيني بشوفة سيدي ربي يمتعها

تحرّاه القلوب اللي غلاه بوسطها مزروع= قلوب ٍ ما وراها الا غلا سلطان يدفعها

نبا نرقص طرب ونشبّ في وجه الظلام شموع= نعيش افراحنا وايامنا المره نودعها

هلا يالشامخ اللي كل شامخ ينثني لك طوع= هلا يالخيّر اللي عز نفسك في تواضعها

كريم ٍ مدته تفرق عن المدات كمّ و نوع= يساره تجمع الاموال ويمينه توزّعها

حنون ٍ كل ما اكتضّت عيون البائسين دموع= يمدّ الها يمين الخير ويكفكف مدامعها