يامل قلب يسج وفيه دولاجه
يامل قلب يسج أوفيه دولاجه
من واهج بالضمائر قام يدرجها
مغير أسير تقول امضيع حاجه
واخذ وأسند علي روحي وأهرجها
وادوج لو كان ما رجلي بدواجه
أدله النفس ليه الله يفرجها
في معزل عن كثير الخلق وازعاجه
ما سمع من الناس لو تكثر لجالجها
يالله ياللي بيدك الضيق وافراجه
ياخالق الخلق ياقاضي حوايجها
تفرج لعيناً إلى غفت بسوهاجه
تجهز عليها الطواري لين تزعجها
بالصدر ضيقه ونوم العين هملاجه
عيناً من العام والسهر أمتولجها
نومٍ سهرها شديد ونوج سهاجه
ونوجٍ تكن الدموع ونوج تزعجها
عليك ياللي بقلبي كأن وهاجه
وهاج نار هوا الغربي يسارجها
راعي ثماناً كما الياقوت لعاجه
كن البرد يوم يضحك في مفالجها
يا روح روحي وزع القلب وانتاجه
الطف بروح عليك الهم ساهجها
وشي ينفعك من حنين القلب واخلاجه
وجروح أسبابها انت ولا تعالجها
أما التفتله وتم الوصل بمواجه
والا بلا عشرةٍ هاذي نتائجها
